لما يبقى في علينا امتحان 3 أسئلة فقط , وال3 أسئلة اتسربوا والكل عرفهم , وأمامك من ستين لسبعين سنة علشان تذاكر في الإجابة ... اللي يدخل بعد كده الامتحان ده وميعرفش يجاوب ... يبقى إيه رأيك فيه ؟ هو بالظبط يا جماعة نفس الامتحان ... امتحان القبر .. 3 أسئلة والأسئلة معروفة وكلنا عارفينها .. وهى 1- من ربك 2- ما دينك 3- ومن نبيك ... ومع ذلك لا نعرف الإجابة ولا بنذاكرها , بالله عليك قبل ما تدخل القبر ... لو سألتك دلوقتي في الدنيا ال3 أسئلة دول هتعرف تجاوب صح ؟ هتعرف تقول كلمتين على بعض؟!...
س1: من ربك ؟ اتكلم عن ربنا ... هتقول إيه ؟؟ تعرف تتكلم 5 دقايق بس عن ربنا ؟؟ ولا حتى دقيقتين , وتلاقى الكلام ضعيف و متلصم ولو حاولت تزود في الكلام هتلاقيك بدأت تغلط ... هل لإنك مبتعرفش تتكلم ؟ ...لا أبدأ ... بدليل أنك ممكن تتكلم عن الموبايلات بالساعة , والعربيات بالساعتين , ومع البنات على الشات بالثلاث أو الأربع ساعات .. يبقى المشكلة في إيه ؟ عدم تعمق معرفة الله في قلبك كل واحد مننا .. بأن الخالق المدبر المهيمن هو الله ... أن المعبود بحق هو الله وحده لا شريك له... أن من له الأمر والنهى والحكم والطاعة هو الله ... أن من نلجأ إليه وندعوه ونستعين به هو الله .. أن من نخشاه والهدف الأول في حياتنا إرضاؤه هو الله ... ولكن المشكلة أن كثيرا مننا بيعبد أشياء أخرى ... في مننا اللي بيعبد نفسه ومننا اللي بيعبد شهوته ومننا اللي بيعبد حبيبته أو زوجته ... فلو عبدنا الله لاشتقنا لسماع الكثير عنه ولعرفنا الكثير عنه سبحانه وتعالى ... وبالتأكيد وقتها هنعرف نتكلم عن الله ... فمتى ستحاول أن تعرف أكثر وأكثر عن الله وتعيش حياتك خالصة لله طالباً بأعمالك رضا الله وأنت في كل أحوالك مستعينا بالله ... فهل عرفت الآن من ربك ؟
س2: ما دينك ؟ ... إن دين كثير منا .... هو الدين اللي على مزاجه ... دين على الهوى ... دين بالتقسيط ... كل واحد بيأخذ من الدين ما يحبه ويترك ما يكرهه ... واحدة تأخذ صلاة وصوم وصدقة وتسيب حجاب شرعي وغض بصر , شاب يأخد دعاء وبكاء في صلاة الحاجة لما يبقى محتاج حاجة من ربنا و يسيب الصلاة في الجامع والنوافل واللحية وسنن الفطرة ... كله ماشي على هواه ... قال تعالى : {{أَفَرَأَيْتَ مَنِ اتَّخَذَ إِلَهَهُ هَوَاهُ وَأَضَلَّهُ اللَّهُ عَلَى عِلْمٍ وَخَتَمَ عَلَى سَمْعِهِ وَقَلْبِهِ وَجَعَلَ عَلَى بَصَرِهِ غِشَاوَةً فَمَن يَهْدِيهِ مِن بَعْدِ اللَّهِ أَفَلَا تَذَكَّرُونَ }}الجاثية23
فلا يصح أن نأخذ من الدين ما نحب ونترك ما نكره بل يجب أن نأخذ الدين كله كافة بكل مطالبة كما يريد الله وليس كما نريد نحن ولا نتبع خطوات الشيطان في التفريط في الدين بالتدريج قال الله تعالى : {{ يَا أَيُّهَا الَّذِينَ آمَنُواْ ادْخُلُواْ فِي السِّلْمِ كَآفَّةً وَلاَ تَتَّبِعُواْ خُطُوَاتِ الشَّيْطَانِ إِنَّهُ لَكُمْ عَدُوٌّ مُّبِينٌ }}البقرة208
فلو تخيلنا أنك بتعمل عند مدير معين هل هتنفذ ما يريده هو أم ما تريده أنت ؟ طبعا ما يريد هو منك .. و إلا لو عملت ما تريده أنت هيرمي شغلك فى وجهك ويطردك من العمل ... فـلله المثل الأعلى .. انظر إلى معاملتك لله سبحانه وتعالى ومع ذلك فالله يعاملك بحلمه ورحمته وفضله ... وأنت على ما أنت فيه من النعم ؟ فهل عرفت الآن ما دينك ؟
س3: من نبيك ؟ قبل أن تجيب ... أتذكر يوم أن سب النبي الكريم – صلى الله عليه وسلم – على مرأى ومسمع من العالم كله ورأيت الصور بعينيك وسمعت السباب بأذنيك ... ماذا فعلت لنصره رسول الله – صلى الله عليه وسلم ؟ هل التزمت وقدمت نفسك لله لخدمة الدين .. أم ( كبرت ) دماغك وبدلا من الرد ذهبت في نفس اليوم إلى مواقعهم الإباحية وحملت أفلامهم وسمعت أغانيهم وعشت عبدا لهم ؟؟؟...
مين قدوتك فى الدنيا ؟ الممثل الفلاني , اللاعب الفلاني , و أنتى مين قدوتك؟ الممثلة الفلانية , المطربة الفلانية .. متى كان رسول الله – صلى الله عليه وسلم – قدوتك في حياتك ؟ متى اقتديت به واتبعت سنته ؟ متى تشبهت به ؟...و أنتى متى كانت أمهات المؤمنين – رضي الله عنهن - قدوتك في حياتك وتشبهت بهن؟ .. ماذا لو رآك رسول الله – صلى الله عليه وسلم - ؟ هل سيقول هذا واحد من أمتي ؟ هذه واحدة من أمتي ؟ هؤلاء من تعذبت بسببهم وسببت وضربت وقذفت بالحجارة ووضع على ظهري سلا الجزور ... وصبرت وتحملت حتى وصل إليهم الدين !! ...
كل ده وبتفكر إنك هتجاوب بكل سهولة وتقول نبيي هو محمد – صلى الله عليه وسلم – ؟ الدين مش بالكلام ؟ معقول هتتساوى مع اللي عاش وأهم قضية في حياته نصرة الدين ونصرة النبي صلى الله عليه وسلم وعاش لخدمة الإسلام والدفاع عنه وغيره عاش لشهواته ونزواته : {{ أَفَمَن كَانَ مُؤْمِناً كَمَن كَانَ فَاسِقاً لَّا يَسْتَوُونَ }}السجدة18
هو شريط تسجيل ... اللي إنت سجلته عليه في الدنيا هو اللي هتسمعه في قبرك .... لو تخيلنا إنك جبت شريط ساعتين وسجلت عليه أغاني وأخذته معاك العربية ... وفوجئت إن ركب معاك أحد الشيوخ مثلا و اشتغل الشريط ... هل هيشغل قرآن ؟ ولا مش هيشغل إلا الأغاني اللي ملياه؟؟ ... كذلك عند السؤال فى القبر قلبك الذي سجلت عليه طوال حياتك أغاني هذا وذاك ... وأفلام هذا وذاك .. قلبك هو اللي هيرد في القبر على أسئلة الملكين ... لا تتوقع إن قلبك اللي إنت سجلت عليه الحاجات دي فى الدنيا .. هيقول حاجة غير اللي إنت سجلتها عليه وملأته بيه وساعتها لا تلومن إ لا نفسك ... فتب إلى الله وبادر بتطهير قلبك ... واشحن قلبك بالسماع عن الله والدار الآخرة وطلب العلم والقراءة فى السنة ... وكن من التائبين لكي يثبتك الله بالقول الثابت فى الحياة الدنيا و في الآخرة عند السؤال ... قال الله تعالى : {{يُثَبِّتُ اللّهُ الَّذِينَ آمَنُواْ بِالْقَوْلِ الثَّابتِ فِي الْحَيَاةِ الدُّنْيَا وَفِي الآخِرَةِ .... }}إبراهيم27
Hitskin.com
موضوع: إلحق الإمتحان إتسرب! 
السبت 05 يوليو 2008, 11:49 am
